Matthew 4
Non Poreke Ngana Olleke Iesus
(Mak 1:12-13; Luk 4:1-13)
1 aKe het Opepengpeng poia Iesus ke i sapele ke langa ich sana lomona e ke la non poreke ngana olleke i. 2 bPe Iesus mete ana toto lo iange ngau ero ke sinanga koana iri ana non kina nai (40) pe miliko iri ana non kina nai (40) lo. 3Pe non poreke ngana la pe olleke i ke teke, “Nenge teke iong NeHalang tuna o hele langa um nemur ke tehul ke iri ngaunga.” 4 cPe Iesus tuacholia pe hele, “NeHalang nena helenga nenge tehas sue ke ulolo, hele ke teke, ‘Non e tu ke maulul nga ngaunga mana ero. Nenge teke mele rahit lochloche helenga mur nenge lohot nga NeHalang hanna pengpeng mele nem lape tu ke maulul.’”5Ol pe non poreke ngana neu mene sapele Iesus ke langa tuele tana palaungana nge Ierusalem. Pe mene heke i langa NeHalang na pele palaungana ona nga lut toto. 6 dOl pe hele lange Iesus ke teke, “Nenge teke Iong NeHalang tuna toto o tamu hot nga lamai ke osio langa ich. Iange NeHalang nena helenga nenge tehas sue ke ulolo, hele ke teke,
“‘NeHalang lape heleia iong lange nena angkelo mur
ke te rahit heke mene iong nga peria.
Pe lape otut hule apem nga um ero.’”
7 eOl pe Iesus tuachol mule lange i ke teke, “NeHalang nena helenga mur nenge tehas sue ke ulolo, hele pule ke pomai, ‘O olleke am Soke NeHalang ero toto.’”
8Ol pe non poreke ngana neu mene heke Iesus langa hengene e nge haka langa lut toto pe henonoua I langa kileng lochloch ngana nga ich pe reia kerkerenga mur. 9Pe hele lange Iesus ke teke, “Nenge teke o tualou sio pe o heto heke iau lape e tunge ure lochloch ngana nemur lange iong.”
10 fPe Iesus tuacholia lange i ke teke, “Iong Satan! O ua toto nge iau. NeHalang nena helenga mur nenge tehas sue ke ulolo, hele ke teke, ‘O heto heke am Soke NeHalang pe o ume mana nge i.’”
11Ol pe non poreke ngana neu ua ke la ol pe angkelo mur teat ke te halaua Iesus.
Iesus Talune Ana Ume Nge Kalelea
(Mak 1:14-15; Luk 4:14-15)
12 gIok, nga etue nenge Iesus longe Ioanes pingana nge tu nga tuele au ngana, lohaka pe la sapele nge Kalelea. 13Iesus hile kileng nge Nasaret pe la ke tu nge Kapernam. Pe kileng nem tunga ech hetaliliu ngana palaungana nenge Kalelea ilina. Nga ich nenga mata nenge Sepulun iri nai Naptali. 14Pe Iesus poingana nem lohot ke pete tote ure nenge hetatalonga Isaias heleia lo. Ke hetatalonga Isaias hele ke teke,15 h “Ich Sepulun pe Ich Naptali nga kue tana
nenge langa ech hetaliuliu ngana palaungana
nenge Kalelea pe nga ech Iortan ilina hele
kileng Kalelea nenge hana lomonmona ngana mur te tuia.
16Nga lamau hehei pe hana nenge tetu nga kileng au ngana
lape te esia lemenge palaungana.
Pe iri nenge metenga ana mulil ma hite iri
lemenge nem tualeme hatalia iri pule.”
17 iIesus talun ke hetoro nga etue neu pengpeng pe haliu ke teke, “A hulia lemo poinga poreke ngana mur iange NeHalang nena naualanga pe nekinga heroi lo.”
Iesus Talun Ke Iua Nena Hana Mur
(Mak 1:16-20; Luk 5:1-11)
18Iok, Iesus i olole nga ech ilina nge Kalelea pe esia hana nai. Hana nai neu titiria hel. Ngana laka Simon nenge te hetue ke Petrus iri nai tina Antreas. Iri nai te hesisio hoat nga ruach sana iange iri hana nenge te holole ruo. 19Pe hele lange iri nai, “A i at ke a nanasia iau pe e poia imo ke aole hana pule!” 20Ueiuei mana iri nai te hile sue aria hoat pe tela ke te nanasia Iesus. 21Iok, tei ole nga lamau ke telala pe Iesus esia hana nai pule. Iri nai titiria hel pule. Elle ene Ieims pe elle ene Ioanes. Pe iri ne Sepeti tutuna mur ia iri. Iri nai te manmana nga aka e pule luluch nge temeria Sepeti ke te palalala aria hoat. Iesus iua iri nai 22pe ueiuei mana te hile sue temeria luluch nga aria hoat pe tela ke te nanasia Iesus.Iesus Hetottoro Pe Hemasmas
(Luk 6:17-19)
23 jIok, Iesus i ke langa kileng lochloch ngana nge Kalelea ke hetottoro nga pele hetoronga mur. Pe haliu hote helenga urana ngana nga NeHalang nena naualanga pe nekinga. Pe pule hemasmasia hehei pe hana nga aria haleles mur. 24 kOl pe Iesus pingana song ke te longe nga kileng lochloch ngana nge Siria. Pomalam te mene iri nenge aria haleles kuenkuena ke te laia iri nge I. Iri nenge te amneia inin palaungana pe iri nenge uneinei tetu nge iri pe iri nenge singiria loiloiloi pe iri nenge singiria metmete pe te laia iri nge Iesus ke hemas mule iri. 25 lOl pe hulua lochloch ngana nga kileng nenge Kalelea pe Tekapolis pe Ierusalem pe Iutea pe nga kileng nenge tu nga ech Iortan ilina hele te nanasia Iesus.
Copyright information for
UVL